PRÓZA  KUIDADU

N ka puéta, ka nhos fronta-m

Próza kuidadu N sabe fase

N ta rabiska, testu nase

Skulpi vérsu, inda, ka pa mi 

Fórma skodjedu fasilita-m majistériu

Si algun dia N fika inspiradu

Y si Minérva nprista-m si “estro”

Pa nhos tudu, N ta skrebe un puéma

Rei di kontenti, N ta gardise es don

Óki noti manxe dia

Óki  n’orizonti ponta sol

Óki txuba baza na txon

Spiga ta ganha na  nha merada

Nsodadu, nha próza ta transfigura

Nha sintási ta ganha fórma

Nha palavra ta bira vérsu

Si aróma ta forma un puéma

Ti txiga na es éden di sonhu

E pa N ka kansa di subi monti

Pa N ka tonba di rótxa runhu

Pa N ba ta bebe agu di fonti

Si Minérva ka aprova-m na izami

So ta resta-m rabiska testu

Konsola ku nha próza kuidadu

Sen fika máguadu nen angustiadu.

Kada un di nos, sima nos é

Nos identidadi, nos verdadi

Sabedoria, konxe nos kabésa

Sidadania, spresa-l  ku sinseridadi

Na próza kuidadu, sima na vérsu trabadjadu.

Nhos pode kridita:

Si  d'un dia pa otu, N disidi rabisba tantu, si

Na nha língua matérnu, ka na otu idióma

É sinplismenti pa prova m'e ta sirbi

Pa formalidadi y informalidadidi

Pa brinka ô  komunika un verdadi

Pa veikula siénsia, kultura ô kualker kanpu d’arti.

Manuel Veiga

12/4/2020