DIPANDRETA  KU  DIPARBÉSA

Esénsia di realidadi é  sénpri un dualidadi:

 Dipandreta ku diparbésa; dipariba ku dipabaxu

Oxji ku ónti; dia ku noti

Matxu ku fémia ; dretu ku tórtu

Grandi ku pikinoti ; bunitu ku feiu

Trabadjador ku pirgisós; riku ku póbri

Bon ku mau; justu ku pekador

Kontenti ku tristi ; filís ku infilís.

É trokadu es dualidadi, tanbe

Ki nu nase nu atxa ta fladu:

Ten Diós, ten Diabu;

Ten Paraízu, ten Inférnu

Kiston ki ta koloka, é kel-li:

Di kal ladu nu debe fika
Kal puzison nu debe skodje?

Raspósta ka faxi pamodi sen un kelotu ka ta kaba.

Mésmu ki nu skodje dipandreta 
Nu ka pode skese ma diparbésa ten

Anton, óki nu sta la dipariba 
Nu meste sabe ma dipabaxu ta izisti

Ma tudu kamiza ten dipandreta ku diparbésa

Ma si oji nu sta kontenti, manhan nu pode sta tristi

Ma filisidadi ka tudu óra, nin ka tudu ténpu

Ma Diós é metáfora di bondadi y Diabu di maldadi.

Nu meste ka skese inda

Ma saúdi ku duénsa, es tudu dos é pasajeru

Ma nos vida, tanbe, un dia el ta konxe si diparbésa

Y kel-li ka ninhun novidadi

Pamodi sima ta nasedu, simé ta moredu
Y é na kontrasti ki lus ta nase.

Asi, si nu prende étika di vida y di mórti

Si nu diskubri ma dipandreta ku diparbésa

Es é dos róstu di un kusa so

Si nu da kada kusa inportánsia ki el ten, nen más, nen ménus

É pusível ki nu vive sen ansiedadi y sen medu

É pusível ki nu diskubri ma dualidadi é nos singularidadi

Y si, livrimenti, nu seta-l, trankuilamenti, tanbe, nu ta vive-l

Óki kel-li kontise, tadju ka ten nu ta alkansa ekilíbriu.

                                                                         3/4/2020

                                                                      Manuel Veiga

                                                   (Duranti kuarenténa di COVID 19)