OBRIGADU  UNIVEÉRSU

Sima mi, so mi!

Univérsu ki fase-m si:

Nha mai ku nha pai, po-m na mundu

Es nxina-m ser algen y sidadon

Ku es N prende prinsípius y valoris.

Di nha povu, N bebe na si kultura ku tradison

N viaja pa mundu, N diskubri valor di diálogu ku toleránsia

Nha univérsu bira más riku, más izijenti.

Na kurva di jornada

N bebe na fonti di família ki N dadu

N ká basta sedi na kel ki mi própi ki forma

Nha amada, fidjus ki el da-m, nétus y nóras

Es é nha rikéza, nos investimentu más grandi.

Na kóntra-kurva di jornada

Univérsu ba ta konpo-m manera di ser:

Ku majistériu di nha profesoris tudu, sen skluzon;

Ku dizafius di tudu nhas alunu, kolaboradis di trabadju y di profison;

Ku kontributu di tudu artista y kriador ki N kruza ku el;

Ku trabadju di tudu profison ki N sirbi d’el.

Anton, nha gratidon y rakonhimentu pa Univérsu

É grandi sima mundu, é fundu sima mar

É razitenti y rizilienti sima nos kriolidadi:

Ta ndêria, ka ta kebra, ta flútua ka ta foga

Ta nada sen tantâria, nen mâria kabésa.

Obrigadu Univérsu
Sima bo, so bo!

Un kusa, N ta garanti-bu:  

Simenti ki bu da-m, bitxu runhu ka ta kume;

 Txuba ki bu manda,  fonti ta ngrosa, spiga ta ponta.

Manuel Veiga, 2/4/2020