KONPASU  PILON

(Djuntamô pa Laba Mon)

Fórti kusa galanti!

Un bitxinhu ki ka ta da nin pa odja

Fase mundu treme, leba tudu algen djunta mô,

Na kanpu ku na sidadi, pa laba mon.

Si nómi é COVID 19

Ramantxadu y dizaforadu ku tudu algen

So ku laba mon nu ta pode stanka-l

Li na kaza, ka na rua nin na trabadju.

Malvadu sima el é, un lison nu prende ku el

Forsa di Umanidadi é djuntamô, é solidariedadi:

Na família, na trabadju, na pulítica, na dizenvolvimentu

Na kultura, na ralijon, na asosiativismu.

É trokadu kel-li ki ser umanu ta jera di óvulu ku spermatozóidi

Stramadu, djuntadu, nbrasadu, na un djagasida izistensial.

É trokadu kel-li, inda, ki, dizenvolvimentu é so ku djuntamô:
Foi si na CE y na UA; foi si na ASEAN y na MERCOSUL

Simé, tanbe, é na NAFT y na Liga Árabe

Foi omésmu ku Unidadi y Luta, di PAIGC

Mas, djuntamô más fórti é na lar, y más grandi é na ONU.

Ta kontise, ki mundu kebra unidadi y djuntamô bira interesi

Violénsia,  diskriminason y rasismu,

Mizéria, injustisa y krimi ambiental toma kónta di planéta.

Dipôs ben anbison di puder, di bira kanpion y mondon di tudu.

Midida intxi ti borota, na orizonti, djuntamô skaderadu fika.

É na es kontestu ki COVID 19 surji

Sen diskriminason, sen rasismu, sen skodjénsa.

Si ka djuntadu na kaza y ku korenténa

Pa labadu mon y pa rafleson na étika di djuntamô

Dilastri ta ten, gentis, grandis y pikinóti, ta móre infetadu.

Na Xina komesa, "lará" na Európa, spadja na Mérka.

Áfrika, personifikason di diskriminason, marguradu, e ba ta ozerba:

Mondon ku kanpion, umilhadu, ta ta inplora djuntamô

Anton, el konklui: maldadi di COVID 19 da-nu un lison di étika:

Na konpasu di Pilon, nu debe djunta mon pa laba mon

Sen diskriminason nen rasismu,  sen splorason  nen violénsia

Sen injustisa sosial nen mania di mondon ku kanpion.

                                                                                    1/04/2020
                                                                                 Manuel Veiga