NADA

Páskua sufridu

COVID nutridu

Vida distruídu

Planéta konstranjidu

                        Mórti bira ka nada

Mondon fépu nafragadu

Nasons tudu tirsidjadu

N kre  umanidadi rasusitadu

Konfinadu sen prazer di nada

Nen na mar N ka pode nada

Pulísia djuntadu fla-m ma nãu

N ka ta buska rabenkada

                        Inspirason kaba na nada

                        Palavras perde sentidu

                        Sintasi fase grévi

                        Poezia  fika lébi

É midjór N ka skrebe nada

COVID ki ben, ta bai si kaminhu

Nobu Páskua al kema si spinhu

Otu vida ta labanta di ninhu

                        Dipôs di purgatóriu, Paraízu é sértu

Na es momentu, inférnu pa tudu banda

Abensuadu gentis di Fé y Speransa

Paxon tamanhu, Séu di eransa

Páskua ka pode engana

Rasureison, si naturéza

Anton, mórti ka nada 

Vida ta triunfa sénpri

                        Bíblia ka ta ngana

                        Nu kúnfia, nu vive dretu

Ka nu skese Mórti-pasájen

Nen di Vida  gazadju-bénsu

Si kel-la  nu konsigi

Inspirason ta torna ben

Palvra y sintasi ta rakonsília

Poezia  ta nase linpu

Mórti ta dixi inférnu

Vida ta alkansa Séu

Kada galu na si puleru

Kada un ku si azágua

Sen nkrénka kifari mágua.