KAVERDI  NHA  KAZA

UNIVÉRSU  NHA MUNDU[1]

Nha naturéza

É banku ku prétu stramadu na kunpanheru

É Nórti ku Sul nbrasadu y solidáriu

É umanu, animal y vegetal, entr’es ta djunta mon

É material, mineral y astral ta sirbi umanidadi

É ambiental, spiritual y selestial ta djobe pontu di ekilíbriu

É subi ku dixi ladera, ta fandata justisa y sabedoria

É jornada kunpridu y disgetós ta baskudja serenidadi.

Na mininénsia y adolesénsia

Skóla ofisial konta-m kasí, N pensa éra si

Es fla-m, N kuda verdadi, ma Kabuverdi k’ Áfrika.

Na juventudi, kusas stranhu nbrudja-m stangu, maria-m kabésa

Dúvida, txeu ka poku, obriga-m fandata undi staba verdadi

N subi Nórti, N dixi Sul, N trabesa Lésti ku Oésti preokupadu

Diversiddadi mostra-m kaminhu di fonti, undi agu ká sabodjadu

N bebe ti N basta sedi, la me N diskubri nha singularidadi:

Kabuverdianu-afrikanu, pó di téra, sidadon di mundu.

É trokadu kel-li ki mi é kriolu-afrikanu-transnasional

Y  afirmason di ex-Pr. Senghor, foi pa mi un lus na Praia dizértu:

“ Le Future de la civilisation est créole”.

Ta kontise ki nha Téra nase kriolu, globalizadu

Dili  ki, pa nos  kriolu, sivilizason di futuru, já  é oji

Infilismenti, propaganda rasista, na 5 azágua, sén bes kontadu

El ben ku si majistériu di spadja Fé y uni Inpériu.

El dispreza língua ku tradison di Téra, si Inu ku bandera el inpo-nu

Ku konsiénsa sakedu na petu, nha povu luta

Txeu gentis móre di fómi, na prizon ô na géra

Mas, nos bandera nu tinha ki finka, nos Inu nu tinha ki kanta

É si ki Liberdadi nase radiante y bisós, na azágua di 1975

“ Déntu  sol ka ta murutxa, déntu d’ agu ta da rabénta”.

Kel-li, própi, ki é nha naturéza, kran ka sukundidu

Kuzinhadu y tenpradu na djagasida di Nórti ku Sul

Labadu y karixadu na agu di nha rubera, na mar di imensidadi

Ttrokadu kel-li, Kabuverdi é nha Kaza; Univérsu é nha Mundu.

Kredu ô ka kredu, tudu pabia ten pamodi

Si bu ka kre si, suguramenti, bu jornada, inda, sta na pé di subida,

Un dia bu al sai txada, bu al diskubri ma “dja, ka ta disdja” :

 Móna ku Cidade Velha dja é Patrimóniu di Umanidadi.

                                                                                  Manuel Veiga

                                                                                     10/04/2020

---

[1] Omenájen pa Luana, nha netinha ki, ku 4 anu, di féria na Mindélu, maravilhada ku movimentus di sidadi, el volta pa si mãi, el fla-l: Praia, nha Kaza; S. Visenti, nha Mundu!