Nha Fé

(Djuntu, nu ta vense, nu ten ki vense COVID 19)

“N ten fé ma nha Téra, ki dja vense txeu tirsidjadura, y grandis batalha di dizenvolvimentu, ta vense, tanbe, dizafiu di kualidadi di vida y di inkluzon sosial. Kabuverdi – di Santu Anton ti txiga na Djabraba; di Pik’ Ntóni kanba Monti Kara; di Birianda pasa pa Monti Gordu;  di Vulkon di Djarfogu ti Santa Mónika; di Djarmai soti na Santa Maria – dja dizenvolve, sa ta dizenvolve, manenti-bai.  Entritantu, nos anbison y nos vizon di dizenvolvimentu ka ta kebe na jeografia stretu di nos ilha y di nos arkipélagu. Más di ki jeografia di ilha, nu kre kontinenti; más ki kontinenti, nu kre jeografia di mundu; más ki mundu, nu kre un dizenvolvimentu di tamanhu di univérsu. Nos fómi di un vida midjór, di djustisa y di konhisimentu inkluzivu, ka ten midida, ka ten frontera.

Nos grandi puéta di kriolidadi, Ovídio Martins, dja flaba y nu ka pode disfla: ‘Nos distinu nu sa ta kunpri: da Kabuverdi otu mar/ otu séu,/ otu ómi.// … Divagar rakonstruson nasional sa ta avansa. Di ilha pa ilha.// Ku dór y na dór. Ku amor y pa amor’. Na es movimentu di bai sénpri pa dianti,  ku odju na séu y na más  kualidadi di vida, N ten fé ma, di ilha pa ilha, enpregu ta omenta, idukason ta globaliza y ta kualifika más, violénsia ta dismantxa y ta dizaparse, trafikantis di dróga ta perde enpregu, abitason kondignu ta bira un direitu inalinável di tudu algen, agu ku eletrisidadi ta pasa ta ser produtu di sportason, info-skluzon ta kaba, kanpanhas eleitoral ta perde sentidu, puder ta transforma na un mison di fraternidadi, korupson na mar di kanal y  más alén na kelotu banda ta perde géra, produson di bens y di konhisimentu ta omenta y ta diversifika,  ses distribuison ta ekilibra y ta umaniza” [1].

Nha Fé ta leba-m kridita, inda, ma nha povu ki dja da prova di vense txeu tirsidjadura, el ta vense, sertamenti, es MALDITU COVID 19.

Forsa, nha POVU; forsa Guvérnu; forsa profisionais di Saúdi y di Suguransa, forsa Voluntárius di pás y di solidariedade.

DJUNTU  NU  TA  VENSE,  NU  TEN  PA  VENSE !

---

[1] (Cf. VEIGA Manue, 2019, Formação de Crioulo – Matrizes Originárias:427).